Mikrobet janë paraardhësit e të gjitha gjallesave dhe sistem mbështetës për të gjitha format e tjera të jetës në planetin tonë. Mikrobet janë gjithashtu përcaktues të shëndetit të njeriut dhe burim i materialeve kritike për përdorim mjekësor dhe industrial. Megjithëkëtë, disa familjarë të tyre përbëjnë një kërcënim serioz për shëndetin e njeriut, të bimëve dhe të kafshëve. Prandaj, mikrobiologjia është thelbësore për studimin dhe kuptimin e jetës në këtë planet.

Sot, mikrobiologjia po ndryshon me shpejtësi të jashtëzakonshme bashkë me ngjarjet që formësojnë perceptimet e publikut për mikrobet, siç janë shfaqja e pandemisë Covid-19, rezistenca ndaj antimikrobikëve, siguria e ushqimit dhe ujit, bioterrorizmi, etj.

Zhvillimet e hovshme të teknologjisë që kanë depërtuar në nivelin e sekuencimit e proteomikës kanë ndërruar lojën në diagnozën, parandalimin, kontrollin dhe trajtimin e sëmundjeve ngjitëse.

Për mikrobiologjinë, koha e sotme, në njërën anë ka në menynë e vet mundësinë dhe përparimin, por në tjetrën edhe sfidën dhe kërcënimin. Kjo e dyta ka ngritur shtat sidomos në shtetet me burime të kufizuara njerëzore e infrastrukturore. Kosova, nuk bën përjashtim nga ky rregull. Prandaj, profesionistët e kësaj fushe në vitin 2006 vendosën që të themelojnë Shoqatën e Mikrobiologëve të Kosovës (SHMK).

Pas shumë sfidash dhe angazhimesh në arenën ndërkombëtare, në vitin 2019, SHMK u pranua si anëtare e barabartë në ESCMID (European Society of Clinical Microbiology and Infectious Disease), FEMS (Federation of European Microbiological Societies) dhe në Shoqatën Ballkanike për Mikrobiologji. Kurse në vitin 2022 edhe në ISAC (International Society of Antimicrobial Chemotherapy)

Mirë se Vini në Shoqatën e Mikrobiologëve të Kosovës!